DISYEMBRE 9, 2019 – NAKA-ULI NA GYUD. Inubanan sa mga mga personahe sa lokal nga gobyerno sa Quezon ug sa 88th Infantry Battalion (88IB), naka-uli na gyud sa Brgy. Sta. Felomina ang lapas sa 100 ka Manobo nga gi-hakot sa siyudad sa Malaybalay ug sa Kitaotao.

Gibutyag sa mga tribal datu nga supak sa ilang kabubut-on ang ilang mga taras ug gipamahayag samtang gi-bisita sila sa maong mga personahe sa gobyerno, gumikan sa pipila ka organizer nga nag-kontrolar sa ilang mga desisyon.

Kahinumdoman nga sa usa ka higayon nga ni-bisita ang LGU Quezon ug Kitaotao sa compound sa Iglesia Filipina Independiente (IFI), wala sila tuguti nga maka-sulod sa pipila ka mga indibidwal nga wala nailhan.

Sa iyang pakig-hinabi usab sa mga pamilya ug sa obispo sa IFI, gi-saaran ni Gov. Jose Ma. Zubiri nga hatagan og pagkaon ang maong mga tawo sulod sa upat (4) ka bulan, haron nga matabangan sila nga maka-barog.

Mipadayag si Mayor “Poling” Lorenzo nga nanghinaot siya nga mo-balik sa normal nga panginabuhi ang mga tawo sa Sta. Felomina.

Sukad nga nasayran nga gibalhin ang maong mga Lumadnong pamilya sa IFI, mibalik-balik sa pipila ka higayon ang Municipal Social Welfare Development Offices (MSWDO) ug Municipal Health Offices (MHO) sa Quezon, Bukidnon haron nga ma-suta ang ilang kahimtang ug ma-ayudahan sila, ilabi na ang mga bata nga masakiton.

Gi-awhag usab ang mga pamilya sa IPMR sa Quezon ug Kitaotao nga mopauli na sa ilang barangay, haron nga manginabuhi sila nga malinawon.

Usa ka dakong babag sa pag-asenso ang mga bahad ug pag-pangilad sa katawhan, busa gi-tahas sa administrasyong Lorenzo nga panalipdan ang katawhan sa mga bahad ug sa sagad nga pagpang-lingla.