HULYO 22, 2020 – Nakadawat ang lokal nga panggamhanan sa Quezon, Bukidnon og pasidungog sa paglambo sa kalidad sa tubig sa Manuto River pinaagi sa pagbaton sa solid waste management ug malahutayong pakigbisog sa komunidad.

Kini atol sa Recognizing Individuals Towards Vibrant and Enhanced Rivers (RIVERS) For Life, kung diin gi-ila ang lungsod sa Quezon, Bukidnon isip 1st runner-up sa 15 ka lungsod nga gisuta sa Department of Environment and Natural Resources (DENR). Gi tunol ni CENRO OIC Forester Virgilio N. Batocail ang Plaque of Recognition kay Mayor “Poling” Lorenzo.

Sa pahayag nga gipadangat ni Mayor Lorenzo, gihingusgan niini ang pag amping ug pagpaniguro sa sayo pa lang isip pagpreserba sa kinaiyahan, pag-likay sa dagkong problema sa umaabot nunot sa pagpasagad sa palibot, ug pag hinay-hinay og bakwi sa ginahimong pag abuso sa kinaiyahan.
Iya usab gipasalamatan ang Barangay Manuto lakip ang uban pang mga barangay nga nanimuyo duol sa maong sapa, sa ilang tabang sa pag-mintinar sa kahinlo niini.

“Environment is our future,” tipik sa pamahayag ni Mayor Lorenzo sa dihang gipahayag niini ang dugang pang mga plano sa pagprotekta ug pagbalik sa kalasangan sa watershed, ug sa pagpadaghan sa kahoy sa kabukiran.

Gitagaan usab og pasidungog ang mga purok nga nagmalampuson sa Search for Cleanest and Greenest Barangay, kung diin nag-agi kini og evaluation kaniadtong tuig 2019.