HULYO 14, 2020 – Isa ka dakong hagit para sa tanan katawhan ang pagsunod sa ehemplo ni Municipal Indigenous People’s Mandatory Representative (IPMR) Hon. Datu Eladio Lilawan sa pagpanerbisyo dili lang para sa lumadnon apan alang sa tanan nga nanginahanglan.

Kini atol sa Necrological Service nga gipahigayon alang kay Datu Lilawan nga giduyog sa mga opisyales sa Probinsiya sa Bukidnon nga sila Sangguniang Panlalawigan members Hon. Benito “Ben” Baguio ug Provincial IPMR nga si Hon. Atty. Richard Macas, mga opisyales sa Munisipyo sa Quezon, National Commission on Indigenous Peoples (NCIP) nga gi-representa ni Mr. Fundador Binahon, ug sa mga sakop ug kauban ni Datu Lilawan sa tribo.

Mipadayag ang 14th Sangguniang Bayan nga gipangunahan ni Vice Mayor Joseph Durotan, Sr. sa ilang mensahe ug kasubo sa pagpanaw sa ilang kauban sa konseho. Gisaysay nila ang ka-maayo nga tawo niini ug mga nabuhat niini nga mga resolusyon para sa kalamboan sa lungsod ug naningkamot kin inga mapahiluna ang mga lumadnon.

Matod pa ni Mayor “Poling” Lorenzo, daghan na ang mga nahimo nga kontribusyon ni Hon. Lilawan sa Quezon, Bukidnon apan ang pinaka-importante nga nahimo niya mao ang pagpaniguro nga maapil ug dili mabiyaan ang mga igsuong lumadnon sa kalamboan sa lungsod.

Gi-uyunan kini ni Provincial Board Member Macas, nga mapadayon ang mga nasugdan na ug himoon nga modelo ang pagserbisyo ni datu Lilawan dili lang sa lumad ug apil na sa tanan katawhan.

Gisaysay sab ni SB secretary Judith Laspinas ang mga programa nga iyang nahimo sama sa paghatag higayon nga makabaton ang mga lumad og PhilHealth, scholarship para sa mga bata, pag-hugpong sa mga tribal leaders, pagpatukod og paanakan, ug ang kamugnaan sa Sunggod ta Kamanga Festival nga gitanyag isip pinaka-authentic nga festival.

Sa panghinapos, gipadayag ni NCIP Fondador Binahon ang mga tribal leaders nga mapadayon ang mga nasugdan na ug mapaniguro nga magkahiusa ang tanan mga tribal leaders ug ang gugma ug panagdait sa matag-usa.