MAYO 15, 2020 – Nipasar sa Department of Health (DOH) standards for Local Isolation and General Treatment Areas for COVID Cases (LIGTAS COVID) ang Municipal Isolation Unit nga nahimutang sa may Wellness Center, ug ang Brgy. Isolation Center sa Poblacion.

Atol kini sa gipahigayong assessment sa DOH Region X ngadto sa Community Isolation Units (CIU) nga gipangunahan ni Dr. Raymond G. Dela Cruz, Vincent S. Labininay, Engr. Jeff Duhaylungsod, ug Christina Delina.

Nagpamatuod kini nga ang maong mga Isolation Units adunay kumpleto ug tukmang facilities, hinungdan nga andam na kini para gamiton kung aduna man magpositibo sa COVID-19 sa lungsod.

Gi-dayeg usab sa mga personahe sa DOH ang lakang sa lokal nga gobyerno sa Quezon, Bukidnon sa pagtukod sa isolation units sa matag-barangay.

Matod pa ni Dr. Dela Cruz, kinahanglan andam ang mga equipment, isolation units ug health workers aron pag-abot kung naa man galing magpositibo, dili na maglisod.

Kahinumduman nga nag inisyatibo si Mayor “Poling” Lorenzo sa pag-andam og Isolation Units sa matag barangay isip pagpangandam kung makasulod man ang virus, ug pagpalit sa mga Personal Protective Equipment (PPE) para magamit nga protektahan ug dili matakdan ang atong mga health workers.

Kanunay sab nagpahigayon og simulation activity ang Municipal Health Office (MHO) aron masiguro nga adunay katakos ug kaalam ang mga health workers sa paspas ug insakto nga pagresponde sa mga kaso sa COVID-19, kung aduna man.