AGOSTO 18, 2020 – Gitinguha sa bag-ong Quezon, Bukidnon Municipal Indigenous Peoples Mandatory Representative (IPMR) Datu Elmer Lilawan nga mahatagan og maayong dungog ang lungsod aron kini mapasigarbo sa katawhan.

Mao kini ang pamahayag sa bag-ong IPMR, atol sa iyang Ordination isip paghulip sa mipanaw niya nga amahan nga Hon. Datu Eladio Lilawan, nga gipahigayon sa Salawagan Covered Court.

Iya usab gidugang nga isip usa ka parte sa bag-ong henerasyon sa mga lideres, iyang paningkamotan nga ipadayon ang kaayohan nga gisugdan sa iyang amahan.

Giuyonan sa mga Lumadnong lideres sa lungsod sa Quezon, Bukidnon ang pag-install kay Datu Elmer isip IPMR, Datu Marcelino Mandanuay pagka Municipal Tribal Chieftain, ug ni Datu Merdelito Anglao isip Vice Chieftain sa Indigenous People’s Federation. Saksi sa maong seremonyas si Mr. Fundador Binahon, National Commission on Indigenous People (NCIP) Community Service Center head.

Gihagit usab ni Mayor Poling Lorenzo ang mga lideres sa tribo sa maong panagtigum nga dili magpabilin sa panahon. Matod pa niya, angay lamang nga mo-uswag na tanan alang sa maayong kaugmaon. Dugang niya, angay usab nga tagaan og pagtagad ang bag-ong henerasyon sa mga batan-on, hinungdan nga gipanghingusgan niya ang pagtukod og dugang sa mga pampublikong high schools.

Kahinumduman nga sukad sa pagsugod sa iyang administrasyon isip Mayor, adunay lima (5) ka bag-ong Integrated Schools sa Sta. Cruz, Palacapao, Sta. Felomina, Magsaysay, ug Paitan nga gi-inaugurate.

Gipanaad ni Mayor Lorenzo og dugang giya ang tribo alang sa pagmintinar sa kulturang Lumad, samtang ga-uswag ang lungsod, dili lamang isip usa ka opisyales, kung dili isip kauban sa mga Manobo nga lumulupyo sa Quezon.

Gidayeg usab ni Vice Mayor Joseph Durotan ang pagkamatinud-anon ni Hon. Lilawan, ug iyag giawhag si Datu Elmer sa pagsunod sa ehemplo sa iyang amahan alang sa matinud-anon nga pagserbisyo sulod sa Sangguniang Bayan, ug sa pagtabang sa Lumad.