AGOSTO 5, 2020 – Gipadayag ni Mayor Lorenzo nga dili lang pagatan-awon ang gidak-on ug gibug-aton sa bata kung dili kinahanglan masiguro nga sustansyado ang ginapakaon sa ilaha. Nunot kini sa iyang laraw nga mahimong smarter, taller, healthier, bigger, ug stronger ang kabataan sa Quezon.

Gidugang sab niya nga kinahanglan makatuon ang mga ginikanan og cooking lessons sa insaktong pagluto sa pagkaon nga sustansyado kay kini ang sukdanan aron masiguro ang nutrisyon sa mga bata.

Atol kini sa gipahigayong orientation ngadto sa Municipal Nutrition Committee (MNC) mahitungod sa Early Childhood Care and Development – First 1000 days (ECCD-F1K) Program sa National Government kung diin isa sa recipients ang Quezon, Bukidnon aron tubagon ang problema sa malnutrition ilabi na stunting.

Tumong niini ang pagsiguro sa full development sa mga bata sugod pagburos hangtod maabot 1000 ka adlaw pina-agi sa health services, nutrition, early education, ug uban pa.

Matod pa ni Ms. Stephanie C. Barrio, ECCD F1K Provincial Nutrition Coordinator, NNC X, kinahanglan dili mahunong ang pag-atiman ug pagsiguro nga matagaan sa insaktong nutrisyon ang mga bata labi na gyod sulod sa 1000 days bisan pa man sa atong gisagubang nga pandemya.

Kahinumdoman nga gisugdan na sa lokal nga gobyerno sa Quezon, Bukidnon pinaagi sa MNC ang programa isip pagtubag sa panginahanglanon sa kabatan-onan sa insaktong nutrisyon aron matagaan sila og “competitive advantage”, kung diin matagaan sila og higayon sa pag-asenso.