AGOSTO 5, 2020 – Gi-dayeg ni Department of Education (DepEd) Region X Assistant Regional Director Dr. Victor De Gracia uban sa mga lokal nga opisyales sa DepEd ang lokal nga panggamhanan sa Quezon, Bukidnon tungod sa paspas nga pagresponde sa panginahanglanon sa mga estudyante ug magtutudlo taliwala sa gisagubang nga pandemya sa COVID-19.

Kini atol sa pamugna og mga learning modules ug pagpalit sa mga materyales nga gamiton para sa bag-ong pamaagi alang sa padayon nga pagtuon sa mga kabataan.

Kini human nila nasayran ang inisyatibong lakang nga gibuhat sa LGU busa diretso kini nga nibisita sa lungsod ug personal nga gisuta ang buhatan sa maong mga materyales.

Gipaninguha ni Mayor “Poling” Lorenzo ang pag-edukar sa mga kabataan alang sa maayong kaugmaon sa lungsod, hinungdan nga gi-supportahan sa lokal nga gobyerno ang mga pampublikong tunghaan pinaagi sa dili lamang pagmugna og learning modules, kung dili apil sa paggahin og pondo nga P10,000 sa matag-skwelahan alang sa pagmintinar sa facilities niini.