SETYEMBRE 22, 2020 – Gi-dayeg ni Department of Education (DepEd) Regional Director Dr. Arturo Bayocot, CESO III ana gipakita ug gihatag nga supporta sa lokal nga panggamhanan sa Quezon, Bukidnon, sulod sa pagdumala ni Mayor “Poling” Lorenzo sa edukasyon ilabi sa pagmugna sa mga modules alang sa tanan mga estudyante sa pampublikong tunghaan sa lungsod. 

Kini iyang gipamahayag atol sa iyang pagbisita sa Unang Distrito sa Quezon, Bukidnon, nga gipahigayon sa Quezon District 1 Office.

“Everyone has the resources but it really needs a leader with a heart,” matod pa niya.

Mitambong usab sa maong higayon si Councilor Jerly “Jay” Areja, District Supervisor Dr. Rolando Acoriba, Jr., ug mga School Heads sulod sa District 1. 

Matod ni Mayor Lorenzo, kinahanglan andamon ang mga kabataan aron makabaton kini sa competitive advantage inig abot sa panahon. Kining competitive advantage makab-ot pinaagi sa paghatag sa insaktong nutrisyon, aron modako sila nga mas kusgan, taas, ug adunay kaalam ug kahanas. 

Tinguha usab sa administrasyong Lorenzo ang paghatag sa higayon aron makab-ot kini sa kabataan, aron mahulma sila alang sa maayong kaugmaon.

Matod usab ni Mayor Lorenzo, kini nga bisita usa ka timailhan nga gi-abagan sa rehiyon ang mga skwelahan sa lungsod. Naghinaot usab siya nga madasig ang uban pang mga tunghaan sa gibuhat sa Quezon, ug matagaan og giya aron mabuhat kini sa tanan.