OKTUBRE 12, 2020 – Gi-ayudahan sa lokal nga panggamhanan sa Quezon, Bukidnon ang 139 ka tawo nga temporaryong namuyo sa Minongan Elementary School, human kini mibiya sa ilang mga puy-anan ug kaumahan sa P7, Brgy. Minongan, Quezon, Bukidnon gumikan sa kalisang ug kagubot nga gidala sa mga personahe sa New People’s Army (NPA) nga midangat sa ilang lugar gikan sa Davao.

Naghatod ang mga personahe sa munisipyo og 20kg nga bugas, 20 ka de lata, ug 2kg nga asukar sa matag-pamilya nga apektado. Gihatagan usab ang mga bakwit nga namuyo sa evacuation center og mga banig, mosquitero, habol, ug mga hygiene kit.

Gipaabot usab ni Bukidnon 3rd District Representative Manuel “Manoy” Zubiri ang mga food packs ug mga tambal isip ayuda sa mga tawo nga temporaryong namuyo sa maong evacuation center.

Kaniadtong Dominggo, Oktubre 11, 2020, gitabangan sa mga personahe sa lokal nga panggamhanan sa Quezon, Bukidnon ang mga tawo nga mibakwit apan walay masakyan. Gisuta usab kini pag-abot sa Minongan Elementary School, kung diin temporaryo silang mamuyo hangtod sa madeklara sa kasundalohan nga linaw na ang ilang lugar, ug pwede na sila mobalik sa ilang panginabuhian.