PEBRERO 26, 2021 – Nanumpa sa katungdanan si Kapitan Fercival Silvestre isip bag-ong Punong Barangay sa Brgy. Linabo, isip paghulip kay kanhi Kapitana Luisa Presbitero.

Gipaabot usab ni Mayor “Poling” Lorenzo ang iyang hagit alang sa mga opisyales sa Brgy. Linabo. Matod niya, lauman sa barangay ang daghang proyekto sama sa pagpasiugda sa usa ka vegetable farm kung diin itanom ang nagkadaiyang mga klase sa utanon nga taas og kalidad, nga makahatag og dakong ginansya alang sa mga lumulupyo.

Matod niya, isa kini nga makahatag kalamboan sa lungsod ilabi na nga adunay Central Public Market nga mag-abri karong Marso 20, 2021, diin mapalit ang tanan gikinahanglan nga pagkaon. Masayran usab ang pagsemento sa dalan sa maong merkado alang sa haruhay nga pagsulod-gawas dinhi. Pinaagi sa maong merkado, matagamtaman na sa katawhan sa lungsod sa barato ug presko nga produkto.

Gidugang sab niya nga andamon ang ka-kugi kay kini ang kinahanglan sa mga tawo aron mahimong mabungahon ang ilang produkto hinungdan sa paglambo sa lungsod.

Gipaabot usab ni Councilor Nilo Bardon ang iyang panimbaya sa bag-ong Kapitan, ug sa mga lumulupyo sa Brgy. Linabo.