HUNYO 24, 2020 – Atol sa pagpirma sa Deed of Donation ug Turnover sa Barangay Site sa Brgy. Mibantang tali sa lokal nga panggamhanan sa Quezon, Bukidnon ug sa konseho sa Mibantang, gipadayag ni Mayor “Poling” Lorenzo ang padayon nga paglihok sa lokal nga gobyerno taliwala sa COVID-19.

Matod pa niya, sama sa mga katigulangan nga nag-agi sa giyera ug mga epidemya kaniadto, kaya usab sa katawhan nga mulahutay bisan pa man adunay bahad sa maong virus.

Matod usab ni Mayor Lorenzo, nagpabilin nga lig-on ang ekonomiya sa Quezon kay kini nagsumikad sa ekonomiya, apan kinahanglan giyapon nga ipadayon ang paglambo sa lungsod.

Mapasalamaton usab siya sa mga lumilihok sa barangay gumikan sa ilang paspas ug insaktong lihok isip paglikay sa COVID-19.

Nagpabilin nga buo ang pondo sa kabarangayan, hinungdan nga dili kini magkulang sa mga kabtangan nga kinahanglan dili lamang sa pagpanagang sa COVID-19, kung dili apil usab sa mga proyekto alang sa kalamboan.

Nagkahiusa si Mayor Lorenzo ug si Vice Mayor Joseph Durotan, Sr., sa pag-aghat sa mga barangay sa pagpahawan sa ilang barangay roads.

Matod pa, usa kini sa gikinahanglan aron sa makanunayong pag-asenso sa katilingban.

Gipadayag usab ni Vice Mayor Durotan nga mas han-ay na ang sistema sa paghatag sa hinabang, gumikan kay giplastar kini sulod sa pagdumala ni Mayor Lorenzo, inubanan sa 14th Sangguniang Bayan.

Gi-dayeg usab ni Councilor Myrna Repalda ang paningkamot ni Mayor Lorenzo sa pag-followup sa papeles alang sa pag-turnover sa maong barangay site.

Matod pa niya, angay lamang mo-salig sa gobyerno kay kini naglantaw sa pag-uswag sa tanan.

Pinaagi sa maong seremonyas, pormal nga gi-turnover sa lokal nga panggamhanan sa Quezon, Bukidnon isip usa ka donation ang barangay site sa Mibantang, kung diin nahimutang ang covered court niini.

Gibatunan usab ang mga pamaagi sa paglikay, sama sa physical distancing, pagsuot sa face masks, ug kahinlo sa palibot.