HULYO 23, 2020 – Gipa-ambit ni Bukidnon 3rd District Representative Manuel “Manoy” Zubiri ang kabililhon sa bayanihan nga sistema sa pagpatuman sa mga proyekto nga nagdala sa kaayohan sa kabarangayan.

Kini atol sa inspection ug turnover sa mga proyekto sa pito (7) ka barangay sa Quezon, Bukidnon, nga gitambongan ni Cong. Zubiri, inubanan ni Bukidnon 3rd District Board Members Benito “Ben” Baguio, Minerva “Bing-bing” Casinabe, ug Joseph “Dodo” Palmada; Mayor “Poling” Lorenzo; ug District Engineer Liberato Tan sa Department of Public Works and Highways (DPWH).

Matod pa ni Cong. Zubiri, nakigtambayayong sila ni Mayor Lorenzo ug sa katawhan sa mga barangay aron matuman ang mga gipanaad nga proyekto sa Brgy. Kipaypayon, Dumalama, Merangeran, Libertad, C-Handumanan, Cebole, ug Mibantang.

Iya usab gipaninguha nga matiwas ang uban pang gipanaad nga mga proyekto sa sunod tuig 2021.

Gipadayag ni Mayor Lorenzo ang iyang pasalamat kay Cong. Zubiri gumikan sa padayon nga pagpanerbisyo taliwala sa pandemya.

Gipanghingusgan niya nga padayon usab nga naningkamot ang lokal nga panggamhanan sa Quezon alang sa pag-uswag sa lungsod.

Sa pikas bahin, bisan pa man nagpadayon ang bahad sa COVID-19, dili dapat ma-undang ang pagpanginabuhi sa mga tawo, busa angay lamang nga mangita og pamaagi aron malikay sa maong sakit.

Tipik sa iyahang pamahayag mao ang padayung pag mabinantayon sa katawhan batok sa sakit nga mikuyanap karun sa tibuok kalibutan. Giklaro sa Mayor nga ang mga kaso sa COVID-19 wala kaabot sa Quezon ug anaa lamang sa Malaybalay, maong mapasalamaton siya sa pag tuman sa mga katawhan sa minimum safety health protocols.

Alayon usab niini, iyang gipaabot sa katawhan ang plano sa munisipyo sa pagmugna sa modular nga pamaagi sa pag-panudlo sa mga estudyante karong umaabot nga panahon sa ting-klase, aron magpadayon ang ilang pag-skwela samtang nagpabilin nga luwas sa virus. Sa maong pamaagi, masinati sa mga estudyante ang blended learning aron dili ma-undang ang ilang pagtuon.

Gi-gahinan na sa lokal nga panggamhanan og pondo ang pagmugna sa mga printed modules nga gamiton sugod karong Agosto 2020.