ABRIL 15, 2020 – Sa pakig-hinabi ni Mayor “Poling” Lorenzo sa mga personahe sa media nga nahimutang sa Quezon, Bukidnon, gi-dasig niya kini nga siguruhon nga insakto ug dili makadala og kagubot ang impormasyon nga ipadayag sa publiko, kabahin sa pagbatok sa COVID-19.

Pinaagi sa reporting nga matinud-anon ug insakto, magpabilin nga lig-on ang pagsalig sa katawhan sa media, matod pa ni Mayor Lorenzo. Makatabang usab kini sa pagpasabot sa mga tawo sa mga gimugna nga lakang batok sa maong virus.

Iyang gi-ambit ang kabililhon sa quarantine, social distancing, ug insaktong hygiene sa paglikay sa COVID-19. Matod pa niya, angay lamang nga kining tulo ang mahimong basehan sa tanan mga lakang o balaod nga ipakanaog sa lokal nga gobyerno.

Usa niini ang quarantine, kung diin tugotan lamang nga mo-gawas ang adunay importante ug valid nga katuyoan sama sa pagpanginabuhi ug pagkuha sa pagkaon, tambal, ug uban pang panginahanglanon. Gumikan niini, mo-kunhod ang higayon nga mo-katag ang virus sa daghang tawo.

Sa pikas nga bahin, dili mo-lampus ang quarantine kung dili makuha sa matag-pamilya ang ilang panginahanglanon–busa gi-turnover sa kabarangayan ang ayuda nga mokabat mga 11,500 ka sako sa bugas ug 750,000 ka de lata gikan sa Probinsiya sa Bukidnon nga gipangulohan ni Gov. Jose Ma. Zubiri, Jr. ug gipun-an sa lokal nga gobyerno sa Quezon.

Kung dili kalikayan nga mo-gawas ang tawo, mahimong batunan ang gilay-on nga usa ka metro pataas aron dili mataptan ang mga tawo sa palibot pinaagi sa laway ug ginhawa.

Kung kanunay usab batonan ang kalimpyo sa panglawas, pinaagi sa pagdisinfect gamit ang alcohol, ug paghugas gamit ang sabon ug tubig, mahimong mapatay ang virus.

Gi-mando usab ang mga barangay nga magtukod og mga isolation centers, haron naay kahimutangan sa mga tawo nga kinahanglan i-quarantine sa matag-barangay. Sa kasamtangan, gipahimuslan na ang pipila ka isolation centers sa pag-quarantine sa walo (8) ka Persons Under Monitoring (PUM).

Pagatukoron usab ang usa ka isolation center nga mahimutang dapit sa Rural Health Unit (RHU), aron masiguro nga ma-layo ang mga tawo nga nakasinati og grabe nga sintomas, ilabi na kung nagpositibo, kung aduna man, ug ma-panambalan kini sa dili madugay sa mga doktor ug uban pang personahe sa Municipal Health Office (MHO).

Gi-awhag usab ni Mayor Lorenzo nga angay tumanon sa lokal nga panggamhanan ang mga kamandoan gikan sa nasyonal ug probinsiyal nga gobyerno. Posible nga makadala og kaguliyang ang pagsupak sa mga palisiya gikan sa kinatas-an. Matod usab niya, kini nga mga palisiya gipanday aron matabangan ang matag-lungsod nga magpabilin nga luwas sa COVID-19.

Isip hinapos, iyang gipamahayag nga dili angay mabalaka ang katawhan sa Quezon. Lauman nga ga-andam ug ga-lihok ang lokal nga gobyerno haron mapanalipdan ang katawhan sa bahad sa COVID-19, haron makabalik ang tanan sa normal nga panginabuhi pagkahuman niining krisis.