ENERO 12, 2021 – Nawala na ang gibating kabalaka sa mga negosyante nga wala makakuha og stall sa Quezon Central Market, human gipasabot ni Mayor “Poling” Lorenzo nga wala sila giwalaan ug pwesto kung dili giplastar lamang ang merkado aron mahimo kining han-ay.

Kini atol sa gipahigayon nga pakighinabi niya sa maong mga negosyante.

Adunay pagamugnaon nga bazaar sulod sa merkado, kung diin mahimutang ang gagmayng negosyante aron makahigayon usab sila sa pag-asenso ug mahimo silang tipik sa kalamboan sa kinatibuk-an.

Gihimo kini sa tinguha nga matagamtam sa katawhan sa Quezon ang usa ka dako nga merkado dinhi sa lungsod nga limpyo, hapsay, ug barato, ug adunay presko ug barato nga produkto aron dili na kinahanglan molangyaw sa lain lungsod aron mamalit og pagkaon.