ENERO 23, 2020 – Gipadayag ni Mayor Poling Lorenzo ang iyang dakong pasalamat sa tanang nisalmot og nikooperar paglukat og business permit sa gipahigayong One-Stop-Shop sugod petsa 3-31 sa Enero.

Base sa natala nga datos sa Municipal Business Permits and Licenses Division, aduna nay 454 ka mga kompanya o indibidwal ang nag-renew og permit sa negosyo ug dugang 53 ang mga bag-ong applikante.

Sugod karong tuiga, ang tanang nag-renew ug mga bag-ong applikante nga naglukat og permiso sa negosyo, adunay dyes (10) porsyento nga pagtaas sa ilang income tax o buhis nga ginabayaran.

Ang maong pagtaas sa buhis dili ginabasta-basta lamang pagmugna kay adunay basihan ang pagimplementar niini. Makita sa section 191 sa Local Government Code of the Philippines diin naay awtoridad ang local nga gobyerno magbag-o og rate sa isa lamang ka higayon og gikinahanglan dili mulapas sa dyes porsyento sulod sa lima (5) ka tuig.

Ang mga nakolekta nga buhis ibalik ra gihapon sa mga katawhan pinaagi sa mga serbisyo diin aduna nay 108 ka mga programa og proyektong imprastraktura sa gobyerno ang giandam alang sa kalambuan sa Lungsod sa Quezon, Bukidnon.