“Kita, desisyonan gayud nato. Unsay gusto nato sa atong kinabuhi? Ang atong kalamboan, kalamboan sa atong anak, ang kahigayunan sa atong mga sumusunod? O sila lang (ang NPA) ang atong tagaan og katungod nga magbuot sa atong dangatan?”

Mao kini ang gipaabot ni Mayor “Poling” Lorenzo atol sa gipahigayon nga Peace Building Seminar sa 3rd Infantry Battalion (3IB) sa tema nga “Insurhensiya Undangan, Kalinaw ug Kalamboan Atong Kab-oton”.

Kini nga three-day seminar nga gitambongan sa mga kanhi sakop ug kaalyado sa mga komunistang rebelde nga mitahan na. Tumong niini ang pagpaklaro sa lakang sa gobyerno nga matagaan og pagtagad ang mga panginahanglanon sa katawhan, ilabi na sa mga oportunidad, subay sa tinguha nga makab-ot nato malungtarong kalinaw.

Matod ni Mayor Lorenzo, tumong sa mga komunista nga diktahan, guboton, ilaron, ug pugngan ang kalamboan sa katawhan, aron lamang magpabilin ang ilang gahum ug diktatura.

Segun niini, iyang giaghat ang mga mitungha nga talikdan na gayud ang maong kalihokan aron aduna silay katungod nga magdesisyon alang sa kaayohan sa ilang pamilya.

Iya usab gidugang nga ang mga proyekto nga napatuman karon, nahimong posible gumikan sa kalinaw nga gibati karon sa katawhan, dala sa pagpakigtambayayong sa kasundalohan ug sa lokal nga gobyerno sa Quezon.