ENERO 22, 2019 – Gisugdan na sa lokal nga panggamhanan sa Quezon, Bukidnon, pinangunahan ni Mayor Poling Lorenzo, ang pagmugna sa plano alang sa pag-rehabilitate sa Lowan-lowan Spring Resort, nga usa sa primary tourist destinations sa lungsod gumikan sa tin-aw ug bugnaw nga tubig niini.

Usa sa mga nahisgotan nga plano ang paghimo sa usa ka Olympic-sized pool, nga mas dako pa sa kasamtangan nga swimming pool. Dugang pa niini ang usa ka mas gamay nga pool.

Apil usab sa plano ang paghawan sa mga kahoy ug pag-usab sa salog ug tiles sa ubos sa swimming pool haron nga malayo ang mga bisita sa disgrasya.

Giplanohan pud ang pagtukod sa usa ka IP shrine isip pagtahod sa Lumadnong gika-gikanan sa lungsod, ug ang pagbalhin sa mga cottage sulod sa Lowan-lowan.

Gumikan sa pagdaog sa Seal of Good Local Governance (SGLG), naka-angkon ang Quezon, Bukidnon og pondo nga mokabat P2.3M nga gi-gahin alang sa pagpalambo sa maong resort.

Usa sa tinguha sa administrasyon ni Mayor Lorenzo ang pagdugang sa ka-anyag sa lungsod, haron nga mapasigarbo kini sa katawhan. Kahinumdoman usab nga gimugna ang Municipal Enterprise Management Office (MEMO) alang sa pagdumala ug pagpalambo sa mga income-generating assets sa lokal nga gobyerno, sama sa Lowan-lowan.