OKTUBRE 25, 2019 – “Angay masayod ang katawhan nga adunay gapanalipod nila.”

Mao kini ang gipadayag ni Mayor “Poling” Lorenzo atol sa gipahigayon nga Refresher Course: The Role of Barangay Tanod in Governance sa Municipal Gymnasium, kung diin gipatin-aw sa mga Barangay Tanod sa 31 ka barangay sa Quezon, Bukidnon ang ilang tahas isip tig-protektar sa mga tawo.

Iya usab gi-dayeg ang mga bantay bayan sa ilang pag-hatag sa ilang kaugalingong panahon ug panglawas alang sa pag-protekta sa katawhan. Matod pa niya, dili ma-likayan ang risgo sa maong trabaho, busa gi-sulod sa 2020 budget ang paghatag og life insurance sa tanan 620 ka tanod sa lungsod.

Gi-hangyo usab niya ang mga bantay bayan nga makig-alayon sa pagpa-undang sa local armed conflict pinaagi sa Whole of Nation Approach nga gipa-hugtan ni Presidente Rodrigo Roa Duterte. Matod pa niya, kung adunay nailhan nga sakop sa komunistang elemento, i-kumbinse kini nga i-tahan ang kaugalingon ug manginabuhi nga malinawon.
Kahinumdoman nga adunay lapas na sa 120 nga kanhi sakop sa New People’s Army (NPA) ug mga kaalyado niini ang gi-tabangan sa lokal nga panggamhanan sa Quezon, human sa ilang pagsurrender sa mga awtoridad.

Matod usab ni Mayor Lorenzo, gi-mugna ang Department of Public Safety alang sa pag-tubag sa mga panginahanglanon sa kalinaw, usa na niini ang kakulangon sa mga ekipo sa bantay bayan sama sa flashlight, radio, ug uban pa.
Gi-hagit ni Mayor Lorenzo ang maong mga tanod nga ipabati sa mga tawo nga adunay ga-protekta sa mga tawo ug sa ilang kabtangan nga gi-hagoan.

Gi-dayeg usab ni Councilor Robert Gue ang pag-alagad sa mga bantay bayan alang sa pag-siguro sa kalinaw, ug sa pag-responde sa panahon sa katalagman.

Gipa-dayag usab ni Mr. Paul Abalde, nga nangulo sa Public Safety Department, nga angay pangunahan sa mga bantay bayan ang pag-tuman sa mga balaodnon sama sa trapiko, apan kasagara sa mga barangay tanod ga-maneho nga wala’y rehistro ang motor. Busa mo-anhi ang Land Transportation Office karong Nobyembre alang hatagan og higayon nga maka-lukat og rehistro ang mga ga-maneho.