HULYO 29, 2020 – Paninguhaan sa lokal nga gobyerno ang mga tukmang programa nga maghatag og kaayohan sa tanan, ug tagaan usab og pagtagad ang panginahanglanon sa katawhan aron masiguro ang malahutayon nga kahapsay ug kalinaw sa lungsod sa Quezon, Bukidnon.

Mao kini ang gipamahayag ni Mayor “Poling” Lorenzo atol sa Retooled Community Support Program (RCSP) meeting, kung diin gihisgotan ang implementasyon sa maong programa alang sa padayon nga pagpa-undang sa bahad sa hiwi nga ideolohiya.

Tipik sa panlantaw sa lokal nga panggamhanan ang pagpatukod sa Quezon Community Hospital, nga mahimong primary care facility ug sumbanan sa sistema sa maayong panglawas sa lungsod; pag-ayo sa Public Market aron ipalambo ang ekonomiya sa lungsod; ug ang pag-ayo sa mga dalan nga agihan sa mga produkto.

Dugang pa niya, kinahanglan usab nga sutaon ang kahimtang sa kabarangayan aron mas paspas ang paghatag sa mga tabang isip pagtubag sa mga molo sa katawhan.

Gipadayag usab ni Mayor Lorenzo ang pagkamahinungdanon sa padayon nga pag-koordinar sa lokal nga panggamhanan ug sa kasundalohan alang sa pag-mintinar sa kalinaw. Matod pa niya, ang presensya sa mga sundalo isa sa nagdala sa dugang seguridad sa kabarangayan.

Gi-mugna sa nasyonal nga gobyerno ang RCSP sa tumong nga matagamtam ang kalinaw pinaagi sa pag-implementar sa mga programa alang sa paghatag sa mga panginahanglanon sa mga tawo.

Gi-tambongan usab ang maong panagtigum ni CLGOO Ms. Maria Maida B. Daniot, mga opisyales sa Quezon, Bukidnon, ug sa kasundalohan ug kapulisan.