MARSO 4, 2020 – Isip pagpananghid, pagpangayo og pasaylo sa mga kalapasan, ug hinaot sa paghatag ilhanan kung musugot sa maong katuyoan, gipahigayon sa tribong lumad sa Quezon ang ritual o pamuhat subay sa gikinahanglan nga pagputol sa kahoy sulod sa Lowan-lowan Spring Resort, nga usa sa primary tourist destinations sa lungsod gumikan sa tin-aw ug bugnaw nga tubig niini.

Gipaninguhaan nga hawanan ang maong resort, ilabi na dapit sa swimming pool, haron mas manindot pa kini ug mahimong luwasnon sa disgrasya ang mga bisita.

Gitawag ang maong pamuhat og lugbak (paghatag piso ug singko), palangasa (padugo),ug panampulot (panag-ambit sa pagkaon). Nagtuo ang katigulangan sa tribo nga kung mamutol og karaang kahoy, naay nagpuyo nga dili makita ug naandan na nga mananghid daan.

Gidumala ang maong ritwal sa Baylan Ritwales nga si Bae Merlin Villanon nga gisaksihan ni Municipal Indigenous People’s Representative (IPMR) Hon. Eladio Lilawan, inubanan ni Tribal Chieftain Datu Carlito Anglao ug uban pang nagkadaiyang lideres sa tribong lumad sa Quezon. Nisalmot sab si Municipal Enterprise Management Office (MEMO) head Engr. Antonio Arcayera.