AGOSTO 29, 2019 – Sa gipahigayon nga Local School Board meeting, gi-tahasan ni Mayor “Poling” Lorenzo ang mga opisyales sa pagpa-uswag sa pamaagi sa pagtudlo sa mga estudyante, alang sa maayo nga performance sa skwelahan.

Matod pa niya, angay nga tutokan sa mga opisyales sa matag-distrito sa Quezon, Bukidnon ang mga kakulangon sa kaalam sa mga estudyante, ilabi na sa mga subjects sama sa English, Math, ug Science.

Gi-hisgotan usab nga angay ipadayon ang mga programa sa sports sa Quezon, kung diin nagmadaogon ang mga batang atleta sa pipila ka higayon.

Gi-panaad usab sa Local School Board nga hatagan og dugang suporta ang mga magtutudlo, pinaagi sa pagtuki sa mga facilities ug sa uban pa nga mga panginahanglanon.

Ni-tambong sa maong kapulongan si Mr. Shem Libucay nga representante sa Teachers’ Organization, District I & II Supervisor Teresito Magtabog, District III Supervisor Vicente Garciano, ug District IV Supervisor Elizabeth Postrano.

Gi-sugyot ni Councilor Jay Areja ang dugang nga pag-susi sa mga hinungdan sa kakulangon sa performance sa mga estudyante.

Gi-awhag usab ni Councilor Rey Baguio ang pag-suta sa mga school facilities sama sa mga building, haron mahibal-an kung adunay kinahanglan ayuhon o i-condemn.

Padayon ang pag-suporta sa munisipyo, ubos sa pagdumala ni Mayor Lorenzo, alang sa insaktong pag-andam sa kabatan-onan, ug sa pagsiguro sa maayong kaugmaon sa tanan.