SETYEMBRE 30, 2019 – Gi-pirmahan na ang Memorandum of Agreement tali sa LGU Quezon, nga gi-representar ni Mayor “Poling” Lorenzo, ug Southern Philippines Medical Center (SPMC), nga gi-representar ni Dr. Pol Vega bahin sa P1M nga pondo nga gi-gahin alang sa tabang pinansyal sa mga indigent nga pasyente nga i-admit sa maong hospital sa Davao City.

Alayon kini sa tinguha sa administrasyon ni Mayor Lorenzo nga mapagaan ang gasto sa panambal ilabi na sa mga indigent nga pamilya. Gumikan niini, ma-kunhuran ang kabalaka sa usa ka lungsuranon, ilabi na sa panahon nga taptan kini og sakit.

Usa ka babag sa paglambo ang pagkasakit, kung diin mabalda ang panginabuhi ug mahurot ang kabtangan nga gi-paningkamotan haron lamang makapa-tambal sa iyang gi-bati.

Kahinumdoman nga pila na ka libo nga pasyente ang napadala sa SPMC pinaagi sa 21 ka ambulansiya sa lungsod. Kumpleto sa ekipo ug facilities ang maong hospital, ug andam kini nga tambalan ang bisag unsa nga sakit.

Gi-dayeg ni Mayor Lorenzo ang dedikasyon sa hospital nga maulian tanan mga pasyente, pinaagi sa ka-hanas sa mga doktor, espesyalista, ug staff sa SPMC, inubanan sa sistema niini.

Matod pa ni Dr. Vega, dugay na kini gi-sugdan ni Mayor Lorenzo. Sa dili pa siya Mayor, daghan na siyang gi-tabangan nga mga pasyente, ilabi na katong mga pobre nga nakasinati ug mga grabe nga balatian.