MAYO 8, 2020 – Gipa-ambit ni Mayor “Poling” Lorenzo ang iyang kalipay sa kahugpongan sa mga hospital directors ug Municipal Health Officers, atol sa gipahigayon nga Southern Bukidnon Inter-local Health Zone Meeting sa Rural Health Unit sa Quezon, Bukidnon karong adlaw.

Matod pa niya, kini timailhan sa lig-on nga pakigbisog nga gikinahanglan ilabi na karong panahon sa krisis. Mapugngan lamang ang pag-katag sa COVID-19 diri sa probinsiya kung maghiusa ang mga personahe sa maayong panglawas sa tumong nga pagpanalipod sa katawhan.

Dako pud ang iyang pagsalig sa maong mga lumilihok sa ilang pagpanday sa mga proseso alang sa padayon nga pagpugong sa virus. Kung makasulod man ang maong sakit, paninguhaan nga dili na mo-katay ang virus ug panambalan ang pasyente, aron dili na kini makadala og perwisyo sa daghang tawo.

Iya usab gipadayag nga nga dapat dawaton ang mga taga-Bukidnon nga nanguli gikan sa lain nga mga lugar, apan kinahanglan mag-koordinar ang matag-munisipyo aron mapangandaman ang ilang pag-abot.

Kahinumdoman nga gi-andam sa Quezon, Bukidnon ang mga barangay isolation unit, kung diin pwede mahimutang ang mga Persons Under Monitoring aron mapadayon nila ang ilang 14-day quarantine period nga dili maka-himamat sa ilang pamilya ug kasilinganan. Aduna usab usa ka Municipal Isolation Unit nga gitukod alang sa mga pasyente nga nakasinati og sintomas ug kinahanglan atimanon sa mga doktor.

Gi-dugang niya nga, bisan pa man matapos ang panahon sa General Community Quarantine, angay lamang nga manganad na ang tanan sa kanunay pagbaton sa mga lakang isip paglikay sa sakit, aron kanunay matagamtam ang siguradong panginabuhi.

Gipadayag usab ni Mayor Lorenzo ang uban pang lakang nga gimugna sa munisipyo alang sa epektibo nga pag-serbisyo karong panahon sa quarantine, sama sa pagplastar sa Municipal Health Office aron nga dili mabug-atan sa administrative tasks ang mga lumilihok niini.

Mapasalamaton usab ang mga nagkadaiyang personahe sa maayong panglawas sa Southern Bukidnon sa pagdasig ug hugot nga suporta kanila ni Mayor Lorenzo.