SETYEMBRE 16, 2019 – Gikalipay sa mga Tribal Leaders sa 31 ka barangay sa Quezon, Bukidnon ang mga gipamahayag ni Mayor “Poling” Lorenzo nga mga tinguha alang sa kalamboan sa mga Lumadnong lumulupyo sa lungsod.

Matod pa niya, iyang gipang-hinaot nga walay mabiyaan sa kalamboan, kay dili lang ni para sa pipila lang, kung dili para sa tanan. Busa i-siguro sa administrasyong Lorenzo ang pagpatukod sa Community Hospital, pag-dugang sa mga Integrated Schools, ug pag-plastar sa sistema sa financial assistance haron nga matagaan ang tanan og higayon na mu-lambo.

Gi-awhag ni usab Mayor Lorenzo nga, bisan pa og ga-dagan ang panahon, dili nato limtan ang atong ka-gikan, ilabi na sa kultura ug pinulongan. Iyang gi-hagit ang mga Lumad nga matinud-anon sa ilang kultura, sa ilang pagpakita niini, sama sa pagsaulog sa Sunggod ta Kamanga.

Nahisgotan usab sa maong kapulongan nga mo-gahin ang lokal nga panggamhanan og pondo alang sa pagpa-tukod sa usa ka Tribal Hall nga haom sa kulturang Manobo, ug mahimong tigumanan para sa indigenous sector.

Nanawagan usab siya sa pagpalig-on sa pagsuporta sa gobyerno, ug dili magpalingla sa hiwi nga ideolohiya.