DISYEMBRE 4, 2020 – Angay pangitaan og paagi nga mapadayon ang mga proyekto aron padayon ang pag-usbong sa ekonomiya dinhi sa Quezon taliwala sa COVID-19, ug padayon sa SIGURADONG PAGPANGINABUHI para makab-ot ang gitinguhang kalamboan sa umaabot nga kaugmaon. 

Mao kini ang gipamahayag ni Mayor “Poling” Lorenzo atol sa gipahigayon nga Turnover Ceremony sa Modular Isolation Unit sa Brgy. Kiburiao, Quezon, Bukidnon.

Madasigon nga gidawat sa konseho sa Brgy. Kiburiao ang maong bag-ong isolation unit nga adunay mga kwarto, gi-andam alang sa mga Locally Stranded Individual (LSI) ug Returning Overseas Filipinos (ROF), isip kahimutangan nila samtang nakaquarantine, aron malikay sa sakit ang ilang pamilya ug mapakgang ang pagkuyanap sa COVID-19.

Mokabat og P892,000 ang pagtukod niining isolation unit. Gipondohan kini sa lokal nga panggamhanan sa Quezon ug sa Department of Social Welfare and Development (DSWD) pinaagi sa KALAHI-CIDSS. Aduna pud dugang pondo nga P80,000 alang sa kagamitan para sa isolation unit.

Nag-alayon ang atong munisipyo ug ang KALAHI-CIDSS sa pagtukod og Modular Isolation Units sa 31 ka barangay sa Quezon, Bukidnon. Una natukod ang Modular Isolation Unit sa Kiburiao, samtang padayon pa ang pagbuhat sa uban pasilidad.