NOBYEMBRE 20,2019 – Ga-hatag og limpyo ug presko nga tubig ang mga water source sa Mikatin, San Roque, ug Linabo, busa angay protektahan ang maong mga watershed areas para sa mga sumusunod nga henerasyon.

Mao kini ang mensahe nga gipa-ambit ni Mayor “Poling” Lorenzo sa gipahigayon nga panaghisgot uban sa Department of Environment Natural Resources (DENR) Region X nga gi-representar ni Allan S. Flores, City Environment and Natural Resources Office (CENRO) nga gi-representar ni Harvey L. Noblefranca, ug Quezon Water District (QWD) nga gipangulohan ni General Manager Rafael Francisco.

Gi-dasig ni Mayor Lorenzo ang QWD, DENR, ug CENRO sa pag-plano alang sa pagpanalipod sa kalasangan sa Quezon, haron nga ma-siguro nga mahimong malahutayon ang water sources samtang ga-dako ang populasyon sa lungsod.

Iya usab gi-ambit ang umaabot nga plano sa LGU Quezon sa pagpa-balik sa ka-lasangan haron nga magpabilin nga himsog ang mga watershed areas. Dugang pa niya, angay usab nga hatagan og pagtagad ang mga Lumadnong pamilya nga nagpuyo sa maong forest areas, busa naghimo og lakang ang administrasyong Lorenzo nga ma-hatagan sila og alternative livelihood pinaagi sa abaca.

Matod pa ni Mayor Lorenzo, pinaagi sa abaca, mahimong ma-tamnan ang mga forest areas samtang makapanginabuhi ang mga namuyo niining lugar. Mahimong itanom ang abaca duol sa mga lumber trees nga maong mo-puno sa mga lasang.

Kahinumdoman usab nga gi-gahinan sa munisipyo sa Quezon og pondo alang sa relocation sa mga pamilya nga nagpuyo duol sa water source sa Magsaysay.