ENERO 14, 2020 – Adunay potensyal ang Quezon, Bukidnon nga mahimong climbing capital of the Philippines, gumikan sa White Rock Wall nga maoy pinakataas nga nataoran og climbing bolt sa tibuok nasod.

Mao kini ang gipadayag ni Mackie Makinano, isip usa ka rock climber ug organizer sa mga rock climbing competition. Matod pa niya, nangandoy siya mga maila ang Quezon isip usa sa premiere rock climbing locations sa tibuok kalibutan, gumikan kay usa ang White Rock Wall ka multi-pitch climbing location.

Gi-dugang usab niya nga dili muubos sa kapin 200 ka ruta nga naay katas-on nga 400 feet ang maong White Rock Wall. Sa Quezon ra usab masinati ang single-pitch ug multi-pitch climbing.

Atol kini sa pagbisita ni Makinano, inubanan ni Lorenz Pring, Eugene Etabis, Arjun’a Actub, Mity Lim Chua, Monyen Rivera, Mikhail Gorra, ug Jan Gorra sa opisina ni Mayor “Poling” Lorenzo isip pasalamat sa iyang pagsuporta sa gipahigayon nga bolting activity.

Kahinumdoman nga usa si Makinano sa mga nagmugna sa Kiokong Rock Climbing Festival, nga gi-tambongan sa rock climbers gikan sa nagkadaiyang nasod.

Usa sa mga tinguha sa administrasyong Lorenzo ang pagpalambo sa mga higayon sa kalingawan sama sa Rock Climbing, kung diin mapasigarbo sa taga Quezon ang kaugalingong lungsod.

#MultiPitchClimbing